(1918) Charrando camín del mercáu

link

-¿Vamos al mercau, Bernaldo?
-Vamos allá, Pachu.
-Güeno, pues andando.
-Oye, Pachu, ¿tú qué lleves que facer al mercau?
-Pos voy á comprar una vaca de lleche, que agora páguenlo bien y ye llástima non aprovechar estes ocasiones.
-Mialma que tienes razón; y quédome tontu co lo caro que está to. ¡Si golvieren los nuestros antecesores á esti mundu, plasmaben al ver lo combiao que está esto.
-Ye una gran verdá, Bernaldo, ¡cómo cambien les coses! Esto consistirá e na guerra, porque á cualquier sitiu que vas á comprar, dícente que to se subió por la guerra. Yo non sé quien recongrio enventó el facer una guerra tan grande y que tantu dañu fai á tos.
-¿Tú non tienes oío á esos que pedriquen e nos metines?
-Sí, home, sí; y acuérdome que dicín que non ficiéramos casu de los cures, que eren un fatu comedores, que estaben engañándonos. También decín que nos asociáramos pa que el amu de les finques que llevamos en renta non abusara tantu de nosotros nin pudiera echamos juera cuando á él y diera la gana.
-Eso mesmo yos oí yo, y creo que tienen muncha razón; pero, quién se atreve á facelo. Si mos asociamos, ye capaz el cura de descomulgamos.
-Pos yo ya casi estoy convencíu, viendo lo que son los cures y los amos nuestros. Creo que debemos facer lo que dicen esos pedricaores, pues estando toos uníos acasu nun pudieren con nosotros nin los cures nin los amos; el cura que se metiera e na ilesia y mandara en so casa; es decir, en su casa non ¡recontra! que ye de toos; él aquí non tien na; que dé gracies si después de que mos resulte eso de asociamos no lu echamos nosotros á él, porque él ye solu y nosotros somos munchos, y lluego la casa donde él vive pue servimos pa Centro, como decíen los que pedricaben.
-Caray, Pachu, pué que tengan razón. Casi estoy yo tamién convencíu; pero, ¿como nos arreglaremos pa deciyos á los vecinos que se asocien con nosotros?
-Eso ye la mar de fácil: podemos llamar a un de esos pedricaores, y él nos lo arreglará to.
-Y agora, amigu, hablemos de otra custión. ¿Non te fijes que estos dís los amos, que nunca se acuerden de nosotros más que pa cobrar la renta, anden con cara de gracia y faciéndonos remilgos?
-¿Non me voy á fijar? Pero, ¿non tas enteráu de que el domingo son les eleciones y vienen á caza del votu? Lo que debemos facer ye non votar más pa ellos y aconseyar á toos los amigos que tampoco los voten. Tengo munches ganes de que mos gobiernen esos que llamen de les izquierdes, pos son xente de más concencia y han de preocupase de nosotros y facer leyes que mos favorezcan. Así ye que el domingo debemos dir toos xuntos á votar pa ellos.
-Ni más ni menos; el domingo reunirémonos toos los vecinos, y á votar por los que nos manden esos pedricaores. Y que rabien los cures y los amos.
-Güeno, chachu, yo voy á dar una güelta pol mercau á ver si hay alguna vaca que me guste.
-Pos hasta lluego; que fagas güena compra y que no se te olvide lo que vinimos hablando.
-Descuida, descuida, que lo que tien cuenta olvídase mal.
-Pues hasta el domingo en el colegio.